Matthew 19
Di agoago di maewae
(Mark 10.1-12)
1Di madagoaa Jesus ne haga lawa ana helekai, gei mee ga hagatanga i Galilee, ga hana gi Judea i di baahi dela i golo di monowai Jordan. 2Digau dogologowaahee ga daudali a mee, mee ga hagahili nia magi digaula.3Hunu Pharisee ga lloomoi gi Jesus ga heeu gi mee belee haga ihala a mee, “E hai behee, tadau haganoho le e hai bolo taane e mee di diiagi dono lodo i di ingoo hua di mee?” 4Jesus ga helekai, “Goodou digi daulia i lodo di Beebaa Dabu dela e hai boloo: I taamada henuailala God dela ne hai nia mee huogodoo, la ne hai taane mo di ahina. a 5God ne helekai boloo: Deenei tadinga taane ga tanga gi daha mo dono damana mo dono dinana, ga buni ang gi dono lodo, gei meemaa dogolua gu hai tuaidina e dahi. b 6Meemaa gu hagalee hai nia huaidina e lua, gu hai hua tuaidina e dahi, malaa, tangada e wwae di mee dela gu haga puni go God gi di gowaa e dahi ai.” 7Gei nia Pharisee ga heeu gi mee, “Moses e aha dela gu haganoho bolo taane la gi heia dana beebaa haga maewae, geia ga mee di maewae gi daha mo dono lodo?” c 8Jesus ga helekai, “Moses ne dumaalia adu gi goodou gi maawae, idimaa, goodou e aago ngadaa, gei mai i taamada di mee deenei hagalee nogo hai. 9Gei au e hagi adu gi goodou bolo maa taane ga diiagi dono lodo i tei hadinga i daha mo tee manawa dahi o di ahina, ga hai lodo labelaa gi tuai ahina, mee gu ihala, gu hai di huaidu di hai be di manu.” d 10Nia dama agoago a Jesus ga helekai, “Maa dela e hai beenei i mehanga taane mo di ahina hai lodo, e humalia hua hagalee hai go di lodo.” 11Jesus ga helekai, “Ma hagalee bolo huogodoo e mee di daudali di agoago deenei, go digau hua ala gu dumaalia ginai mai baahi o God. 12Idimaa, nia hagadilinga mee e logo ala ne hidi ai tangada ga deemee di hai dono lodo. Hunu gau ne haanau, gei e dee dohu. Hunu gau gu hai nia daangada dee dohu gi hai beelaa. Hunu gau hagalee haga hai lodo idimaa Tenua o God di Langi. Ma iai tangada i golo e mee di kae di agoago deenei, geia gi kae ina.”
Jesus e haga maluagina nia dama lligi
(Mark 10.13-16; Luke 18.15-17)
13Nia daangada ne laha mai nadau dama gi Jesus bolo gi haga uda ina ginai ono lima gi dalodalo ina i digaula, gei nia dama agoago a maa ga wwou gi digaula. 14Gei Jesus ga helekai, “Dumaalia ang gi nia dama gi lloomoi gi di au. Hudee daahia digaula, idimaa Tenua o God di Langi la ni digau beenei.” 15Gei mee ga haga uda ono lima gi hongo nia dama, nomuli gei mee ga hagatanga ga hana.Tama daane maluagina
(Mark 10.17-31; Luke 18.18-30)
16Dahi daane ne hanimoi gi Jesus ga heeu, “Meenei, tangada agoago, di humalia behee e hai loo gi hai ko au, gei au ga mee di hai mee gi di mouli dee odi?” 17Jesus ga helekai, “Goe e aha dela e heeu mai gi di au be dehee di mee dela e humalia? Tangada hua e-dahi dela e humalia. Maa goe e hiihai gi di mouli dee odi, haga kila ina aga nia haganoho.” 18Gei mee ga heeu, “Nia haganoho behee?”Gei Jesus ga helekai, “Hudee daaligi tangada gi made, hudee hai be di manu, hudee gaiaa, hudee hai kai tilikai, e 19hagalaamua ina doo damana mo doo dinana, aloho i tangada i doo baahi gi hai be doo aloho i di goe.” f 20Tama daane deelaa ga helekai gi Jesus, “Nia haganoho huogodoo aanaa la gu hai ko au. Ma di mee labelaa i golo e hai loo gi hai ko au?” 21Jesus ga helekai, “Ma bolo goe e hai loo gi odi anga, hana, huia gi daha oo goloo huogodoo. Wanga ina nia bahihadu gi digau hagaloale, gei goe ga maluagina i di langi, gei goe hanimoi, daudali mai au.” 22Di madagoaa tama daane ne longono ia nia helekai aanei, geia ga hana manawa gee huoloo, idimaa, mee tangada maluagina. 23Jesus ga helekai gi ana dama agoago, “Goodou gi iloo bolo e haingadaa huoloo ang gi tangada maluagina di ulu i Tenua o God di Langi. 24Au ga hagi adu gi goodou bolo ma koia e mada haingadaa ang gi tangada maluagina di ulu i Tenua o God, i di manu-‘camel’ ma ga ulu gi lodo di bongoo di iwi.” 25Ana dama agoago ala ne longono di mee deenei, gu homouli huoloo, ga heeu, “Malaa, koai dela e mee di haga mouli?” 26Jesus ga huli adu gi digaula, ga helekai, “I baahi o nia daangada di mee deenei e deemee di gila, gei i baahi o God nia mee huogodoo e mee di kila!” 27Gei Peter ga helekai gi mee, “Meenei, gimaadou gu kili gi daha madau mee huogodoo, gu daudali adu goe. Dehee laa di madau hui?” 28Jesus ga helekai, “Au e hagi adu gi goodou di tonu bolo goodou ala ne daudali mai au la ga noho gi hongo nia lohongo aamua e madangaholu maa lua, ga dagi nia madawaawa madangaholu maa lua o Israel, i di madagoaa Tama Tangada ga noho i hongo dono lohongo king madamada, i di madagoaa e haga hoou ai nia mee huogodoo. g 29Digau huogodoo ala gu kili gi daha nadau hale, nadau duaahina, nadau damana, nadau dinana, be go nadau gowaa i dogu ingoo, digaula ga kae dagi llau gi nonua, gei e wanga labelaa ginai di mouli dee odi. 30Malaa, digau dogologo ala i mugi nua dolomeenei, ga i-muli, gei digau dogologo ala mugi muli dolomeenei, ga i-mua. h
Copyright information for
KPG